CLICK HERE FOR BLOGGER TEMPLATES AND MYSPACE LAYOUTS »

Sunday, October 5, 2008

حاضر فى وطن غايب !! شعرلابراهيم عبد الفتاح فى ابراهيم عيسى .

يا إبراهيم
يا إبراهيم
إحنا هنا
بصلنا من النضارة
مش نضارتك طبعاً
نضارة الزنزانة.. انت سامعني
رغم التشويش والتهويش
صوتي واصلك وواصلي
تكبيرك وانت بتصلي
العيد عندك مش عندي
أنا والدستور والشعب المصري واقفين
مع إننا بره.. مساجين
زينا زيك بالظبط
نفس الأزمة والربط
ما هي دي حكومة أعمال
وأنا بيني وبينك فرحانلك
مبروك.. المحاسيب حبسوك
تستاهل
ما انت فاكرها بالساهل
تطمن علي صحة غيرك ليه
ما هو قاعد ومربع
لا كوارث ولا قر بينفع
كل ما نصرخ بيتبت
ونعارض يتشبت
ويرعرع وينبت
وبيطرح بجمال
ولا بتهزه مظاهرة
ولا بيزيحه مقال
ربك وحده القادر وبأيده الأعمار
عشش الفقر انهارت هدتها أعمار
وانت عنيد ومكابر
مؤمن في زمن كافر
من وانت في اللفة
قدرك تبقي الألفة
لا بتقبل بالواقع
ولا ترضي بموالفه
قلنالك كبرها.. مش مقالاتك
راسك
قلنا لك غيرها واهتف للسياسات
بمزاهر وصاجات
مش عايز تسمعنا
ومصمم توجعنا
قلنا لك أجرها
وخد لك طن حديد
تبقي ف عز وتعلي
مش محبوس في العيد!
ما تجاوب يا أبو يحيي
كل ما يقفلوا شارع
تجري وتفتح ناحية
وبتديهم فرصة
طيب عيني ف عينك
مش وقعت البورصة
كان إيه اللي غاصبنا
تغلط وتعصبنا
وبتحرق أعصابنا، والشوري والقومي
حتي دولار أمريكا وقعته وبهدلته
طقس الكون بدلته
وبتشتي في الصيف
وحرقت بإهمالك مسرح في بني سويف
وسعها وعرضها
بقي كل اللي باقيلنا ضوافيرنا نقرقضها
الفرصة تضيعها والنعمة بترفضها
ضحيت بالعمولات
ورفست الريالات
انت أثرت الفتنة
وردمت الأنهار
بأحسد صمودك والجبل منهار
وأحسد نضارة بتحرج الأزهار
وأحسد حماسك والبشر أموات
بأحسد صراحتك في زمن كداب
وأحسد حضورك والوطن في غياب


Bookmark and Share

6 comments:

elsha3er said...

السلام عليكم

حفا كلمات رائعة وجميلة

احمد الشاعر

mido said...

أهلا و سهلا

استاذ أحمد الشاعر

ليكوريكا said...

جميله

وجميله اوي

بعشق كلمتنا برغم لحنها الحزين

كل سنه واحنا متكلمين

ليكوريكا

mido said...

ليكوريا

القصيدة الجميلة للشاعر النشط
ابراهيم عبد الفتاح

mido said...

*ليكوريكا
:)

elsha3er said...

السلام عليكم

ارجو التواصل والعودة لمدونة مدونى الاسكندرية

احمد الشاعر